Latest Recipes

.ഉപ്പുമാങ്ങാ കറി


ഉപ്പുമാങ്ങ !!!!! എന്ന് കേള്‍ക്കുമ്പോഴേ വായില്‍ വെള്ളം നിറയാത്ത മലയാളി ഉണ്ടോ..

നമ്മള്‍ മലയാളികള്‍ക്ക് ചില രുചികള്‍ മനസ്സിനു പിടിച്ചു കഴിഞ്ഞാല്‍ പിന്നെ ലോകത്തിന്റെ ഏതു കോണില്‍ പോയാലും ഇതൊക്കെ നൊസ്റ്റാള്‍ജിയ തന്നെ.....പണ്ട് കാലത്ത് ,അല്ല ഇപ്പോഴും പല വീടുകളിലും വലിയ ഭരണികളില്‍ ഉപ്പുമാങ്ങ ഉണ്ടാക്കി സൂക്ഷിക്കുന്നുണ്ട്.കുറെ കാലം ഇത് കേടുകൂടാതെ നില്‍ക്കും.ഉപ്പുമാങ്ങ വെറുതെ കഴിയ്ക്കുവാന്‍ നല്ല രുചിയാണ്.എങ്കിലും ഇത് കൊണ്ട് ഉണ്ടാക്കാവുന്ന ചില തനി നാടന്‍ വിഭവങ്ങളും ഉണ്ട്,അവയില്‍ പ്രധാനം ഉപ്പുമാങ്ങ ചമ്മന്തിയും ഉപ്പുമാങ്ങ അരച്ച്കലക്കിയും പിന്നെ കറിയും ആണ്..
മാങ്ങാ ചെറിയ കഷണങ്ങളായി മുറിച്ചും മുറിയ്ക്കാതെ മുഴുവനായി തന്നെ ഇട്ടും ഈ കറി വെയ്ക്കാവുന്നതാണ് .
എന്നും ഊണിനു കാച്ചിമോരും ചമ്മന്തിയും സാമ്പാറും മാത്രം കൂട്ടി കഴിച്ചു മടുത്ത് ഇരിക്കുമ്പോള്‍ എവിടെ നിന്നെങ്കിലും രണ്ടു ഉപ്പുമാങ്ങ കിട്ടി ഈ കറി ഉണ്ടാക്കി ചോറ് കഴിയ്ക്കുമ്പോള്‍ ഉള്ള ആ ഒരു സന്തോഷം....നാടന്‍ രുചികള്‍ ഇഷ്ടപ്പെടുന്ന ഓരോ മലയാളിയ്ക്കും ഇങ്ങനെ തന്നെ ആണ്..

.ഉപ്പുമാങ്ങാ കറി
................................
ആവ്ശ്യമായവ:

ഉപ്പുമാങ്ങാ -- ആളിന്റെ എണ്ണം അനുസരിച്ചു മൂന്നു നാലെണ്ണം എടുക്കുക
ഇനി ഇപ്പോള്‍ നിങ്ങൾക്ക് മാങ്ങാ മുറിച്ചു ഇടാനാണ് ഇഷ്ടം എങ്കില്‍ 2 എണ്ണം മതി.
പച്ചമുളക് - മൂന്നു അല്ലെങ്കില്‍ നാല്
തേങ്ങാ ചിരവിയത് -- 1 കപ്പ്‌
കുഞ്ഞുള്ളി --4 എണ്ണം
ജീരകം - ഒരു നുള്ള്
മഞ്ഞള്‍പ്പൊടി - 1/4 ടീസ്പൂണ്‍
വറ്റല്‍ മുളക് - 2
കറി വേപ്പില - ഒന്നോ രണ്ടോ കതിര്‍
കടുക് , എണ്ണ, ഉപ്പ് , വെള്ളം എന്നിവ പാകത്തിന് എടുക്കുക..

ഉണ്ടാക്കുന്ന വിധം:
ഉപ്പുമാങ്ങ കഷങ്ങളായി മുറിച്ചു /അല്ലെങ്കില്‍മുറിക്കാതെയോ കുറച്ചു വെള്ളവും പച്ചമുളക് കീറിയതും മഞ്ഞള്‍പ്പൊടിയും ചേര്‍ത്തു വേവിയ്ക്കുക.
ഈ സമയം ഒരു മിക്സറില്‍ തേങ്ങ ,ജീരകം എന്നിവ നല്ല നേര്‍മ്മയായി അരയ്ക്കുക.മാങ്ങാ നല്ല മൃദുവായാല്‍ ഇതിലേക്ക് തേങ്ങാ അരപ്പ് ചേര്‍ത്തു ഇളക്കുക.രണ്ടു മൂന്നു മിനിട്ട് ഒന്ന് ചൂടായി തിള പോലെ വരുമ്പോള്‍ തീയ് അണയ്ക്കുക .ഉപ്പ് ആവശ്യം എങ്കില്‍ ചേര്‍ക്കുക.
ഇനി ഒരു പാനില്‍ കടുക് താളി ച്ച് ഇതിലേക്ക് ചേര്‍ക്കുക.കറി തയ്യാര്‍ ആയി .ഇനി ഈ കറി കുറച്ചു നേരം ഇരുന്നു മാങ്ങയും ചാറും ഒക്കെ ഒന്ന് നന്നായി പിടിച്ചിട്ടു വേണം കഴിയ്ക്കാന്‍..നല്ല കുത്തരി ചോറിന്റെ കൂടെ കഴിക്കുന്നത്‌ നല്ല സ്വാദായിരിക്കും ....

ചിത്രത്തില്‍ ഇല്ലാത്ത ഒരു റെസിപി കൂടി ഇരിക്കട്ടെ ,,,,,,

ഉപ്പുമാങ്ങാ അരച്ചുകലക്കി
..................................................
രണ്ടു ഉപ്പുമാങ്ങയും ഒരു മുറി തേങ്ങയും എരിവിനു ആവശ്യമായ കാന്താരിയും
എടുക്കുക.ഉപ്പുമാങ്ങയുടെ മാംസളമായ ഭാഗം ചെത്തി എടുത്തുബാക്കി മാറ്റി വയ്ക്കുക .
മാങ്ങയുടെ ഭാഗങ്ങളും തേങ്ങയും കാന്താരിയും ചേർത്ത് അരച്ചെടുക്കുക .
ഉപ്പിനു പകരം ഉപ്പുമാങ്ങായിലെ വെള്ളം ചേര്‍ക്കുക.
മാങ്ങയുടെ പുളി മതി.ആവശ്യത്തിനു വെള്ളവും നേരത്തെ മാറ്റി വെച്ച മാങ്ങാണ്ടിയും ചേര്‍ത്തു തിളപ്പിക്കുക.ഇനി കടുകും ഇത്തിരി ഉലുവയും കറി വേപ്പിലയും വറ്റല്‍ മുളകും താളിച്ചിടുക.



« PREV
NEXT »

No comments

Post a Comment

ഈ റെസിപി നെ കുറിച്ചുള്ള നിങ്ങളുടെ അഭിപ്രായം താഴെ എഴുതി അറിയിക്കുക.

Please do Comment Here Your Views About This Recipe, We respect your Comments...

so please dont hesitate to comment